2009年9月5日 星期六 晴
尋晚又煲番龍利葉羅漢果瘦肉湯啦!
所以煲完後就記得影低啲相先.
不過台灣好似唔見有龍利葉呢樣湯料,
因為我係之前喺香港藥材鋪買返嚟嘅!
都係曬乾咗嘅綁埋一嚿嚿咁㗎.
香港啲街市都有得買到新鮮嘅龍利葉,
以前我喺香港嗰時, 我阿媽仲有喺屋企種咗兩盆龍利葉,
有時就直接剪啲龍利葉落嚟洗乾淨就攞嚟煲湯喇!
所以以前我哋成日都飲得到呢種湯㗎!
不過而家佢都冇種啦! 我都唔知佢幾時冇種喎!
呢種湯都係消暑湯嚟㗎!
夏天又熱又燥, 好容易熱氣,
咁所以都會飲呢個湯嚟清吓熱氣同潤吓肺啦!
又係對條氣管同個肺有益囉!
所以又係平時飲嘅保健湯水啦!!
除咗有龍利葉同羅漢果, 仲有南北杏同蜜棗,
仲有就係甘筍同瘦肉囉! 都係最基本嘅煲法啦!
呢個湯又係有啲甜甜地㗎! 仲會飲到龍利葉嘅味道添㗎!
煲番: 再煮 藥材鋪: 中藥店 綁埋: 綁起來 一嚿嚿: 一綑一綑
街市: 市場 成日: 常常 條: 數量詞, 可等同國語「的」或「那個」
相關湯水文章連結:
http://sheilacantonese.pixnet.net/blog/post/239028746
http://sheilacantonese.pixnet.net/blog/post/238030244
http://sheilacantonese.pixnet.net/blog/post/236796287
全站熱搜
留言列表