唔知係咪所有熱戀中既情侶,都會為對方做啲肉麻到痺,娘到爆既事呢?如果問我既話,我舉手認架!記得細個既時候,我知道于素秋鍾意聽歌,於是就諗到一個自己認為冧死女既方法氹佢開心。我會學啲電台DJ咁鍊起把聲,懶感性咁講啲肉麻說話,跟住再加埋啲情歌,一次過錄晒喺盒錄音帶度送俾佢。基本上九十年代所有hit過既情歌我都錄過俾佢架喇!錄好餅帶之後呢,我仲會喺帶上面寫住《撒亞人的情歌集》,有齊volume 1至 30架!講真吖,今時今日我自己都唔敢聽番,我驚我會嘔呀!我以為于素秋已經將啲帶丟晒架喇,冇諗到今日居然俾我喺佢架車度,聽番自己細個嗰把聲,原來于素秋仲留住我送俾佢既錄音帶架…
一路聽番盒帶,我記番好多以前同佢拍拖既嘢,好多好多片段,原來仲係咁深刻,有時我仲會諗到笑咗出嚟添!
今日同于素秋打邊爐嗰陣,佢話自己份人好專一,細個鍾意食啲咩,大個咗一樣鍾意。唔知喺愛情方面,佢又係咪一樣呢?佢咁講,唔通有啲咩暗示?唉,男人老狗,喺度亂諗乜嘢吖?真係頂自己唔順,又要早啲抖喇!
文章人物介紹: 于素秋(鍾嘉欣飾)
文章來源: 甘永好(林峯飾)家好月圓Blog
http://blog.tvb.com/moonlight07/2008/08/20/%e6%92%92%e4%ba%9e%e4%ba%ba%e7%9a%84%e6%83%85%e6%ad%8c%e9%9b%86/
痺: 被電到或毛孔豎起的感覺. 娘到爆: 太過像女人的樣子
冧死女: 是指用各種方法使女生感覺自己被捧上天的窩心, 「冧」是含有討歡心窩心的意思.
氹: 哄 鍊起把聲: 把聲帶拉緊後發出聲音. 懶~咁: 自以為~的那樣子 加埋: 加上
餅帶: 一盒帶子, 「餅」是數量詞 聽番: 再回聽, 聽回 盒帶: 一盒帶子, 「盒」是數量詞
打邊爐: 火鍋 份人: 這種人, 「呢份人」=這種人 頂唔順: 受不了
早啲抖: 早點睡, 「早抖」可以解釋為「晚安」, 如果用不好的語氣很重的說出來的話「早抖啦」是有「省省吧」的意思.
留言列表