台北聚會－Sheila的廣東話世界

其實呢個function係上年8月份喺台北君悅KTV搞㗎!
我拍低佢哋每個人講嘅嘢, 又影咗啲相, 就係等我將呢啲video同相po出嚟,
但係因為搞完function之後, 我就返咗香港兩個禮拜, 之後返嚟台灣, 就一直拖,
有陣時會執下片咁啦, 又拖到而家先扚起心肝將啲影片全部剪好, 打好哂字,
仲要上傳去網站, 又要做好排版, 又要整兩個地方, 一個係呢度, 一個係喺知識團嗰度,
所以都真係幾咁嘥精神嘥功夫去搞掂佢, 而且又迷上咗穿水晶珠仔, 所以先至拖到而家囉!
仲有呀, 想話睇下團長雪貂影啲相可唔可以po出嚟, 點知等佢等到冇哂影!
同大家一齊有傾有講真係好開心, 下次希望仲可以見到你哋呀!

有陣時: 有時候       執下片: 修改一下影片       扚起心肝: 奮發圖強       嘥: 浪費, 花費       冇影: 不見踪影       有傾有講: 談天說地

而家就嚟睇下佢哋講咗啲乜嘢啦! 下面呢個人又話唔想出鏡, 所以我加咗啲效果落去, 而家睇唔到佢個樣囉!

要觀看內容, 請將右邊正在播放的音樂播放器或影片檔暫停

話說N年前, 有朝早我去麥當勞, 好有禮貌咁同賣包嘅女人講.
「唔該, 豬柳漢堡呀!」嗰女嘅同我講:「要蛋(等)呀!」
嗰時我身上冇乜錢, 我又唔係太鍾意食豬柳蛋漢堡,
於是我就好有禮貌回答:「唔要蛋(等)呀! 唔該!」
嗰女人好勞氣咁講:「你要蛋(等)喎!」
我開始冇乜耐性, 我答:「我唔要蛋(等)呀! 我只係要豬柳漢堡呀!」
嗰女人更加勞氣咁話:「要等一等呀! 要等十分鐘呀!」
講完!

勞氣: 很煩躁的

下面有括弧括住嘅係我講嘅囉!

(由阿鄭生開始), 叫Jones, (Jones開始), 人哋都叫Indiana,
1988年過香港, 之前點解會諗住學廣東話嘅時候, 因為有啲香港僑生過到台灣讀書, 我同學有幾個係香港人嚟㗎!
佢哋成日踢波, 一個字:「屌[𨳒]!」(屌, 粗口嚟個喎), 乜都入唔到. 就係啦!
第一個字啦! (第一個學嘅字就係屌), 係喇!
(OK, 跟住呢), 跟住嚟香港之後, 一句都唔識講, 成日俾啲香港人蝦,
買嘢佢哋唔騷我, (買嘢唔騷你), 唔賣, 唔係話唔賣, 就交貨遲啲啦,
最尾都唔理啦, 都話我聽唔到, (哦, 聽唔明), 聽唔明, 係啦, 後尾冇辦法喇,
就試下講啲普通話啦, (下! 但係呢), 但係佢哋都話點解你唔講中文嘅,
你嗰啲普通話唔係中文嚟㗎!
冇辦法喇, 唔學唔得㗎喇, (哦, 咁樣呀), 出街買嘢, 做乜嘢嘅話, 人哋都…冇話蝦啦,
就係好多唔方便啦! (好多唔方便呵! 係啦, 咁收尾幾時學識嘅), 差唔多年幾啦! (一年幾呀, 就學識喇)

括弧: 括號       成日: 常常       踢波: 踢球       蝦: 欺負      唔騷: 不理會
最尾: 最後       後尾: 後來       收尾: 最後, 結果

下面呢位miss話唔要出鏡, 咁就背住我哋嚟講啦!!

咁我哋講完之後, 順便玩下遊戲, 睇下邊個猜羸, 我就送我親手做嘅吊飾啦!

呢度仲有其他人嘅video, 大家去睇睇:
http://sheilacantonese.pixnet.net/blog/post/245050457

相關嘅文章:
http://sheilacantonese.pixnet.net/blog/post/243484508
http://sheilacantonese.pixnet.net/blog/post/239013170
http://sheilacantonese.pixnet.net/blog/post/245047193