截拳道－Sheila的廣東話世界

要觀看內容, 請將右邊正在播放的音樂播放器或影片檔暫停

歡迎收睇新聞智富，我哋提起李小龍，好多人都會提到佢所拍嘅經典功夫電影。其實李小龍喺67(1967)年所創立嘅武術哲學截拳道亦都為人津津樂道，李小龍年青嘅時候喺美國西雅圖修讀哲學，其間鑽研武術。

傳統嘅中國武術重視招式同埋美感，而李小龍嘅截拳道就主張實用、簡單、快速，認為攻擊就係最好嘅防禦；主張消除花巧, 用最直接嘅方法去擋對手嘅攻擊，同時進行反擊，喺對方冇預警之下作出攻擊，快速有力咁樣壓制對手。

截拳道重視嘅除咗係大家平時所熟悉嘅拳格之外，亦都柔合挾摔、倒地、纏鎖等等，被認為係融合咗詠春、柔道、空手道、跆拳道同埋摔跤；同其他中國武術唔同，截拳道係一種理論，冇任何招式，認為動作係愈靈活愈好。

而家喺美國好流行嘅綜合格鬥UFC就係受到李小龍嘅影響，比賽幾乎冇任何規則，只要係正當嘅方法就可以喺擂台上面攻擊對手，睇起上嚟就好似李小龍嘅電影「龍爭虎鬥」入面嘅格鬥場面。UFC嘅總裁曾經講過，李小龍係綜合格鬥之父。

而截拳道亦都曾經引起派系爭議，李小龍基金會將截拳道加上李小龍嘅原名，成為振藩截拳道，反對嘅人批評截拳道唔係李小龍專屬，不過贊成嘅人就覺得，截拳道係李小龍所創立，加佢個名都冇唔妥。

傳統中國思想好多時作為老師，或者師傅都會將絕技保留一啲，以免教識徒弟冇師傅，不過李小龍就冇咁做喇！無論係對手或者係徒弟，佢都毫無保留，將所學所知傳授，所以得到對手嘅尊敬。

由佢嘅故事或者可以學到啲待人處事嘅道理，今集新聞智庫講到呢度喇！