Sheila的廣東話世界

上星期六約咗班網友兼族友去飲下午茶.
唔好以為係飲奶茶呀, 咖啡呀, 食蛋糕呀嗰啲下午茶喎!
係嗰啲賣港式點心嘅下午茶, 食到飽嗰隻!
一講到話食到飽, 咁梗係會有一乍人係咁夾走哂啲嘢食啦!
所以嗰日個個就好似輪米咁,
排到佢嗰個就夾到成個碟滿哂放唔落嗰隻先至走開.
哈哈, 所以唔好諗住啲點心係一碟一碟咁分開架.
睇吓啲相就知啦!
不過其實嗰日主要嘅唔係為咗食架!
我其實就係為咗呢個主題啦!!
就係「講爛GAG」啦~
嗰日佢哋都唔知我準備咗啲貓紙架,
就係等佢哋差唔多食到咁上下嗰陣時,
我就要佢哋每個人要用廣東話講爛GAG,
咁梗係有貓紙俾佢哋照住嚟講啦!!
唔係臨時臨急又點識講呢!?
佢哋輪流抽一張, 跟住俾佢哋練習吓~
嚟啦~ 到你講啦!!
哈哈~
睇吓嗰日佢哋講咗咩, 問咗咩先啦~~~
有一塊火腿同一條腸仔放咗落同一隻鑊度，點解佢地唔傾計？
有一日，火柴人行行下街覺得個頭好痕，結果係點呢?
小明喺20樓跳咗落街...佢無死到...但係點解會死咗隻雞呢?
最咸濕嘅粥, 係咩粥?
有咩人曾經見過龍???
你哋而家可以對住啲字就好快知道問咩問題,
但係嗰日係冇得俾你睇架, 淨係得個聽咋!
個個聚精會神咁聽, 有時會聽到耳仔都側埋呀!!
你哋又知唔知答案呢?

 

就係一碟全部放埋一齊啦!! 就咁食囉! 唔係點啫!

 

傾得咁開心嘅? 等陣仲好玩呀!!

 

呵呵, 路人甲仲識得擺POSE添喎!
嚟齊啦! 後面你哋兩個企喺度啱啱嚟到快啲坐低啦!!

 

食雪糕咁好呀? 原來個雪糕係人哋請我食架! 我後嚟先至知呀.

 

等你食埋啲蝦先啦!! 一陣你第一個講好冇呀??

 

有一日公仔軟糖行行下路，行咗一陣，佢話~~
咩話? 再講一次~~

爛GAG: 冷笑話     嗰隻: 那種     一乍人: 一群人     係咁夾: 不停的夾
嘢食: 食物     輪米: 輪流領米     貓紙: 小抄     咁上下: 差不多
臨時臨急: 匆匆忙忙     腸仔: 西式小香腸     鑊: 炒菜鍋     度: 那裡
傾計: 聊天     行行下街: 在街上走著走著     痕: 癢     咸濕: 色色的
咋: 而已, 罷了     耳仔: 耳朵     側埋: 歪一邊     等陣: 待會
坐低: 坐下來     好冇: 好不好

Sheila於2009/08/06 22:23回覆

ccc..

你諗唔到答案咩?

啲答案好簡單咋.
點解都冇人估下嘅?

下次一定會搵埋你, 定啦!!

Sheila於2009/08/07 18:51回覆

有一塊火腿同一條腸仔放咗落同一隻鑊度，點解佢地唔傾計？
因為佢地仲未熟囉.
有一日，火柴人行行下街覺得個頭好痕，結果係點呢?
佢拗拗下個頭, 跟住個頭著火, 跟住就死左lu...
小明喺20樓跳咗落街...佢無死到...但係點解會死咗隻雞呢?
因為佢阿媽劏隻雞還神囉!
最咸濕嘅粥, 係咩粥?
係及弟粥呀
有咩人曾經見過龍?
眼大嘅人咪睇過龍囉!!

哈哈

Sheila於2009/11/12 22:05回覆 

下次有機會搵你黎講啦, 好冇?

香港
高雄