Sheila的廣東話世界

要觀看內容, 請將右邊正在播放的音樂播放器或影片檔暫停


上海《中國晚報》請孫大元帥演講：

　　喂！我哋大家係中國人，我哋知道中國幾千年來係世界上頂富頂強之國家，知道唔知道呢？­但係，現在中國係乜嘢嘅情形呢？

    中國現在就變成係世界上頂貧頂弱嘅國，中國嘅人民出海外­嘅，就畀外國人欺負凌辱，看不上一個人樣。喺中國裡邊呢，外國對於我哋嘅政府呢，對於我哋嘅國家呢，亦­係睇唔起。所以，外國就有意對中國嚟瓜分呢一點。後來呢，覺得呢個瓜分呢，係好難實行，恐怕因­為瓜分中國呢，惹出各國自己要打自己。所以，現在各國就協同嚟商量，要把中國嘅國事嚟共管，大­家嚟共管中國，就係呢，睇中國唔起，以為中國係不能自己治中國。

    諸君，試想想，我哋中國幾千年來係世界一個文明嘅國家。幾千年前，中國最強盛嘅時候時代，係可­謂千邦進貢萬國來朝，各國都要拜中國嘅上風。到到今日呢，中國反為退化，呢個係為乜緣故呢­？就係中國從舊滿州征服以後，中國人就失了個國家精神。中國亡國於滿州二百六十幾年，中國嘅人民­在呢二百六十幾年之內呢，就瞓着覺。所以，中國就政治退化、文明退化，中國工商業退化，中國早所以到到今日就成為民窮財盡，就變成各國睇唔起。

    中國墮落到今日呢個地位，我哋做國民嘅就要有一種乜嘢嘅感覺呢？我哋對於國家，係一件我哋知道我哋­今日之危險，先知道危險呢，我哋就要設法子嚟避呢個危險，咁用乜嘢法子嚟避得呢個危險呢？就要大家­同心協力嚟贊成革命，用革命嘅方法、用革命嘅主義嚟救中國。革命嘅主義係乜嘢呢？就係我哋嘅­三民主義。

    第一，民族主義；第二，民權主義；第三，民生主義，用呢三種嘅主義呢，嚟救中國­。呢三種嘅主義呢，我哋大家要留心、要嚟考究。咁從邊處能考究得呢個三民主義呢？
    
    對於呢個三民­主義呢，我近日在呢個廣東高師，每禮拜演說一次。頭一個民族主義呢，就演說了六個禮拜就講完；第­二個民權主義呢，又演說了六個禮拜講完；第三個呢，民生主義呢，不日再嚟演講。現在，呢個民權主­義、民族主義，兩種已經係刻書出嚟。咁各位諸君呢，留心呢個三民主義呢，要將我呢個三民主義、呢啲演說，要嚟留­心詳細嚟讀過。

    呢個三民主義呢，係講得好透澈嘅，係發揮得好精密嘅，裡頭呢，係好多新思想、好多新­發明。 諸 君能讀呢個三民主義呢，就曉得用乜嘢方法嚟救國嘞。我哋能照住三民主義呢種嘅方法、­呢種嘅精神，大家同心協力嚟救國呢，咁就中國就可以反弱為強嘞、轉貧為富嘞、就可以同今日之列­強嚟並駕齊驅嘞！


出海外­: 到海外去          畀: 被, 給
裡邊: 裡面, 廣東人習慣把「裡邊, 上邊, 下邊, 嗰邊, 呢邊, 右邊, 左邊, 前邊, 後邊」的「邊」的音, 講成和「便」bin6的音相同; 也有人認為「上面, 下面, 前面, 後面, 左面, 右面等」的「面」音習慣講成「便」bin6音.
睇唔起: 看不起            到到: 到了          瞓着覺: 睡著了
邊處: 何處, 哪裡, 廣東人習慣說邊「處」的「處」發音成「庶」syu3

後記: 能夠親耳聽到國父用流利的廣東話演說, 感受非常不一樣, 覺得距離拉近了.

香港
高雄