將心比己 @ Sheila的廣東話世界

要觀看內容, 請將右邊正在播放的音樂播放器或影片檔暫停

人為萬物之靈，咁..係咪動物就冇靈性嘅呢？其實唔係㗎！動物佢都有佢嘅靈性。
嗱！好似而家我講俾大家聽，關於一隻老牛嘅故事就係喇！

喺1980年呢，中國福建省寧德市支提山賽岐村嗰度有一隻黑色嘅老牛，呢隻公牛呢，佢已經係誒..好老㗎喇！咁佢嘅主人呢，準備將佢賣俾嗰啲屠夫將佢宰殺嘅！

嗰個牧童就話俾嗰隻老牛知噃；「你聽日呢就會俾人賣咗就去劏㗎喇」咁。
個老牛一聽到之後呢，佢就立即向呢個牧童下跪，仲不停咁流淚喇，好似向個牧童求救咁！

個牧童就好驚奇嘞噃！立即返屋企同佢爸爸媽媽講，又話埋俾附近啲鄉里知。

嗱，當時聽到嘅人都唔相信嘅，所以呢，個個都走嚟睇下呢隻老牛喇！

當時見到咁嘅情境呢，好多有善心嘅觀眾呢，佢哋發起自願大家將啲錢集埋一齊嚟將隻牛買咗佢，唔好俾佢去個屠夫度宰殺喇！

咁佢哋買咗隻牛之後，就送到去個支提山寺嗰度放生。

從此以後呢，好多人去探呢隻老牛嘅時候，嗰隻黑牛都會向佢跪低，表示答謝佢救命之恩嘅！

最係誒..不可思議嘅就係，凡係寺中講經或者係早課晚課嘅時候呢，呢隻老牛都會行近嗰度...誒..聽經，好恭敬咁樣，而佢俾人哋趕嘅時候呢，佢都繼續唔肯走，都留番喺度。

但係去到1990年十月十三日呢，呢隻老牛好似有靈性，佢知道自己係應該誒...離開㗎喇，就嚟死㗎喇，佢自己自動咁走出去個寺外邊，佢瞓咗喺個地下度，咁就係往生咗喇！你話係咪好奇呢？

而喺圖片裡邊你見到除咗黑牛跪嘅圖片之外，仲有一隻白牛㗎！

呢隻白牛呢係喺2008年，斯里蘭卡一間寺院裡邊，呢隻白牛係喺個屠場嗰度，俾僧人係救佢出嚟嘅，當時嘅圖片係表示佢向僧人下跪感恩。

嗱，呢啲黑牛白牛嘅個案呢，係好清楚話俾我哋聽，動物都有佢嘅靈性，佢都會恐懼死亡，佢都唔想俾人宰殺嘅！

我哋身為萬物之靈，我哋亦會感受到痛，會覺得我哋嘅親人被傷害嘅時候，我哋好難過，將心比己，我哋應唔應該係戒殺護生呢？