農曆新年習俗 @ Sheila的廣東話世界

要收看內容, 請按暫停右邊正在播放的音樂播放器或影片檔

以前每逢喺大除夕晚, 好多父母都會帶屋企嘅細路仔去街賣懶嘅!
「蝦仔呀, 而家同你賣懶喇, 好開始俾心機讀書喇! 知唔知呀? 賣懶賣懶…」
有啲父母呢, 更加會將一塊啱啱煎好嘅糯米粉, 放喺張凳上面, 然後叫個細路仔坐上去喎! 意思即係等佢喺新嘅一年成日都黐住張凳, 勤力讀書呀嘛!
「哎呀, 老爺, 唔駛勞氣..」「企定!」「得喇得喇, 我有辦法..」「真係冇用架你!」「嗱, 依個糯米粉, 坐喺度啦! 吓, 坐喺度! 係喇, 好好地坐喺度, 以後乖乖地讀書. 吓.」「咁樣得架咩?吓?」「得架..」

喺過年裡面, 去親戚朋友屋企拜年, 自然係唔少得嘅節目嚟架啦! 以前啲人去拜年, 所帶嘅手信, 同而家有好大嘅分別嘅噃! 嗱, 大多數呢, 都係用個漆盒, 裝住一啲自己整嘅應節食品嘅, 例如煎堆呀油角呀咁樣, 貪佢好意頭, 而且最重要嘅, 就係經濟呀嘛!
「係…紅紙一張呀!」「求其求其!」「多謝人啦!」

「老爺, 飲杯茶啦!」
不過, 喺1926年省港大罷工之後, 由於本港製嘅糖果餅乾比較平, 於是啲人就興起去士多, 買三幾毫子餅乾, 用個紙袋包實呢就當手信咁去拜年架啦! 而家大家睇落去就覺得好寒酸呀, 但係對於以前啲人嚟講, 好隆重個咯喎!
「衰仔, 淨係識食…」
後來到咗30年代, 由於罐裝糖果餅乾比較盛行, 香港人漸漸呢就用罐裝糖果拜年喇! 直至到而家過年禮品嘅包裝更加講究, 更加多姿多彩啦!
「坐啦, 坐啦!」「隨便坐!」

嗱咁以前啲生意人呢就好鍾意插吊鐘花個喎, 因為嗰陣時呢就仲係沿用大清律例, 咁行科舉制, 啲人梗係希望高中啦, 咁中中聲, 好意頭呀嘛!
咁但係後尾呢因為太多人插吊鐘花啦, 搞到個山嗰啲吊鐘呢就嚟絕種咁滯, 政府呢就禁止佢哋上山斬啦! 咁於是乎啲人改插桃花咯喎!
咁除咗插花之外呢吓, 每年到到開年嘅時候, 啲老闆就會慰勞啲工人呢食番餐開年飯個喎! 不過呢啲開年飯呢, 就有人快樂, 就有人愁呀!
「唉, 今年生意又唔好! 睇怕都要炒我架喇!」「咁擔心做乜嘢呀! 過得一日得一日囉! 諗咁多嘢做乜啫!」「係囉, 未必係你嘅!」「各位各位」「老細!」「多謝晒! 多謝大家一年到晚咁幫我手呀! 嚟嚟, 坐坐坐…嚟, 大家飲杯先, 飲杯飲杯…」
開年飯枱面嗰碟雞通常都有特別意義個喎! 當老闆主動夾件雞俾席上其中一位伙記嘅呢, 即係話暗示佢會被炒魷魚啦! 呢件雞可算真係無情雞喇!
「點解會係我呀?」「原來唔係我呀! 哈..」「點解會係我呀?」
不過而家勞工短缺, 伙記食鮑參翅肚就有啫! 食無情雞都怕冇乜可能啦!
哎呀, 無情雞呢個滋味, 大家都心中有數喇, 小心啲呀, Mary.
唔好嚇我啦! 而家都唔興咩無情雞架喇! 不過講開又講呀, 起南北行呢個行頭呢, 以前有一個習俗個喎! 就係呢到過年期間行四條街, 不如大家一齊睇吓.

呢個故事係發生响20年代, 當時嘅老吳係一間南北行嘅老闆, 不過, 生意一直都唔好, 呢日已經到咗舊歷嘅12月16日, 即係尾牙啦! 每個人都喜氣洋洋等住過年, 但係佢就愁眉苦臉喇!
「財哥!」「吳老闆, 過年咯喎! 我條數都怕有喇啩?」「有有有, 財哥話,呢輪生意唔係幾好話! 過多幾日呀? 過多幾日又實掂喇話!! 吓吓, 幫幫忙啦話?」「過兩日就無謂喇! 聽日我再嚟過, 如果聽日都冇嘅話呢! 唔好怪我唔客氣呀!!」「冬菇嚟個喎!」…「我出出去睇吓有冇辦法先啦!」…「嗱, 阿寶話, 你睇住舖頭先話!」
於是, 老吳就開始漫無目的咁响上環四周圍行喇!
「唉, 永安街話! 你話我好似條街名咁話, 永遠安樂就好喇話!」「哼, 永吉街話! 意頭好啦話! 永遠吉利話! 唉, 行多兩條街睇吓話! 睇吓會唔會轉運先話!」
結果, 老吳就一口氣行咗四條有永字頭嘅街喇! 包括永安街, 永吉街, 永和街同埋永勝街, 頭尾一共行咗四條街, 咁啱佢返到舖頭之後, 果然, 天降福星噃!
「事頭呀! 你哋有冇啲靚啲嘅冬菇鮑魚髮菜蠔豉咁呀? 每樣同我執啲啫!」「請問要幾多話? 吓?」「啊, 每樣同我執十斤架啫! 要靚啲架啫!」「十斤話! 仲唔快啲去執嘢話! 啊, 老細, 入嚟坐呀!」「唔使客氣!」
老吳呢次發達啦! 呢件事好快就喺南北行傳開去, 於是, 每逢到年尾, 南北行嘅商人都會學老吳一樣行永吉, 永安, 永和同埋永勝呢四條街嘅! 想話搏番個好意頭呀嘛! 行吓行吓就成為咗佢哋嘅新年習俗喇!

屋企: 家裡     細路仔: 小朋友     俾心機: 用功, 多用心     啱啱: 剛剛
等佢喺新嘅一年: 讓他在新的一年; 這裡的「等」是「讓」的意思     成日: 時常, 整天
唔駛勞氣: 不用生氣(煩躁)     企定: 站住     貪佢好意頭: 求(取)它的好意頭; 「貪」有貪求,貪取的意思
紅紙: 紅包的意思; 也可以說「利是」     求其: 隨便, 隨意     平: 便宜     興起: 流行起; 「興」是流行的意思
士多: 是英文STORE的譯音. 商店的意思     三幾毫子: 三毛多     包實: 包緊, 包好
淨係識食: 只會吃; 「淨係」是只是的意思     鍾意: 喜歡     嗰陣時: 那個時候     梗係: 當然
後尾: 後來     咁滯: 語助詞. 帶有太過頭, 到盡頭的意思.     斬: 砍     睇怕: (看看)恐怕
諗: 想, 思考     老細: 老闆     俾: 給     鮑參翅肚: 鮑魚海參魚翅魚肚
起: 「在」的意思, 與「喺」「响」都是「在」的意思. 有三種說法.
行: 走(路)     响: 「在」的意思     條數: 那個帳(目); 「條」數量詞; 「數」是帳目的意思
呢輪: 最近     實掂: 一定行; 「實」一定; 「掂」行     聽日: 明天     舖頭: 店舖     同埋: 「和」的意思
咁啱: 剛巧     事頭: 老闆(話事的頭兒)     執: 收集, 收拾, 撿等的意思