年三十嗰日日頭, 我哋走咗出去香港島嗰邊,
去番我細細個去過嘅兵頭花園睇吓,
其實我真係唔知點行架!
因為係我讀小學嗰時學校旅行去架!
咁細個坐住架大旅遊巴, 落車行過去,
根本都唔記得喺邊處!! 之後都冇去過啦!
所以去到金鐘站, 想話坐巴士上去囉.
點知遇著個掃街阿姐,
佢話行過去對面上山嗰度就係喎!
咁呀?! 咁就行囉!! 行過啲高樓大廈先囉…
嗰日個天想落雨添呀! 潮濕到乜都出水呀!!
行呀行呀…行咗上去香港公園囉喎…喺邊架?
見到個牌寫住「香港動植物公園」…又行啦..
終於見到個牌啦….
再行到行人隧道口, 又見到呢個啦….
落咗隧道上返嚟見到呢個行車天橋個牌…Albert譯音譯做亞厘畢!!??
哈哈…我諗起前幾日香港有單笑到爆嘅新聞,
有間酒樓嘅點心菜牌「牛柏葉」英文係「Albert Yip」喎!!??
真係笑到攬住個肚碌哂地呀!!
以後邊個叫「Albert Yip」嘅人兄又多個花名啦!!!
嘩…行咗出嚟條路行過埋山頂纜車站….行過咗呢條天橋底,
原來仲有條咁長嘅斜路上去架??
真係行到索哂氣呀….卒之到咗喇!!
公園對面個景呀….又有中國建築, 又有歐洲教堂建築,
加埋匯豐銀行同渣打銀行兩棟嘢, 真係唔知點形容呀…
入去門口入面又有個牌坊寫住「紀念戰時華人為同盟國殉難者」
左邊同右邊一樣, 不過年份就唔同喇…
右邊嘅係1914至1918年, 左邊嘅係1939至1945年,
左邊嘅我知梗係日本仔打香港嗰時, 但係右邊嗰個係咩事呢…
上到嚟呢個噴水池度啦!! 我記得我細個嗰時,
就係喺呢度野餐啦!! 嗰時個個同學仔都集合一齊食嘢啦..
不過啲印象就唔係咁清楚喇,
都唔知嗰時個噴水池係咪同而家個一樣呢?!
知唔知隻大猩猩喺度做乜呢? 佢隻右手喺度挖緊個屎忽呀….
啲蝴蝶標本都好靚喎!! 隻豹整得仲唔似係標本添喎!!
入面有個兒童遊樂場, 好耐冇玩過氹氹轉喇!!
細細個: 小時候 邊處: 哪裡 有單: 有一則 菜牌: 菜單menu
攬住: 抱住, 抱著 碌哂地: 碌地=滾地; 哂是助語詞加強語氣表示全部
索哂氣: 索氣=喘氣 屎忽: 屁股 氹氹轉: 轉圈圈
留言列表